Sud u Norveškoj odbio zahtjev sina princeze Mete-Marit da je posjeti u bolnici

Marius Borg Hojbi (29), sin norveške princeze Mete-Marit (52), neće biti pušten iz pritvora da posjeti bolesnu majku u bolnici, odlučio je apelacioni sud u Norveškoj.

Sud je naveo da „i dalje postoji velika vjerovatnoća da bi Hojbi mogao da počini nova krivična djela ukoliko bude pušten na slobodu“. Niži sud u Oslu je ranije dozvolio njegovo puštanje radi posjete majci, ali je tužilaštvo uložilo žalbu, a policija se protivila.

Hojbi se suočava sa optužbama za silovanje, uključujući četiri tačke optužnice, a presuda će biti izrečena u ponedjeljak. Tužilaštvo traži kaznu zatvora od sedam godina i sedam mjeseci, dok odbrana traži oslobađajuću presudu.

Njegova majka, princeza Meta-Marit, ima ozbiljne zdravstvene probleme sa plućima, hospitalizovana je i nalazi se na listi čekanja za transplantaciju pluća. Ljekari su saopštili da bi bez transplantacije mogla da živi još oko godinu dana.

Hojbi je na sudu rekao: "Sjedjeti tamo dok je mama toliko bolesna je nepodnošljivo" i istakao da mu je teško što ne može da bude podrška majci. Takođe je naglasio da sada "nikada ne bi učinio nešto što bi pogoršalo situaciju".