Šikorski upozorio Rusiju: Znamo šta planirate protiv Poljske, nemojte to raditi

Poljski premijer Donald Tusk potvrdio je da računa na moguću ograničenu vojnu provokaciju Rusije protiv Poljske i da su naredni mjeseci kritični. Vicepremijer i ministar spoljnih poslova Poljske Radoslav Šikorski poručio je ruskom predsjedniku Vladimiru Putinu: "Znamo šta planiraš i nemoj to da radiš!".

"Ne plašimo se, pripremamo se ali ne možemo da to nipodaštavamo. Svjesni smo opasnosti i zahvaljujući informacijama od naših saveznika. Poljska se vrlo intenzivno sprema za razne scenarije", kazao je Tusk povodom vijesti poljskog portala Onet.pl da Rusija planira ograničenu vojnu operaciju u Poljskoj kao test reagovanja NATO.

Šikorski je podsjetio da režimi takvog tipa često pribjegavaju provokacijama, poput Hitlerove Njemačke, kako bi imali lažni izgovor za početak rata. "Naša poruka je: znamo šta planiraš i zato nemoj to da radiš", poručio je Šikorski Putinu.

Ministar odbrane Vladislav Košnjak-Kamiš istakao je da "kognitivni rat Rusije u glavama Evropljana" i razne hibridne operacije, diverzije i sabotaže postaju svakodnevica, kao i pokušaji da se Poljaci posvađaju među sobom i sa saveznicima. "Sve vrijeme je strategija Rusije kognitivni rat. Mi eliminišemo pokušaje sabotaža i diverzija. Hapšenja pokazuju koliko je jak taj pritisak Rusije", rekao je Košnjak-Kamiš.

Premijer Tusk je dodao da naredni mjeseci mogu biti kritični zbog promjena u ratu i odnosu snaga u Ukrajini. "Nemam namjeru nikoga da plašim ali naredni mjeseci i zbog izvjesne promjene karaktera rata u Ukrajini mogu da budu zaista kritični", rekao je Tusk.