Hronika
Alžir preokrenuo Jordan i ostao u trci za nokaut fazu na Mundijalu
Alžir je u drugom kolu grupe J savladao Jordan 2:1 i zadržao šanse za plasman u nokaut fazu, dok su Jordanci eliminisani.
Sjajan meč u Santa Klari donio je preokret Alžira u duelu sa Jordanom u drugom kolu grupe J - 2:1.
"Pustinjski ratnici", kojima je ovo prvi trijumf na Mundijalima poslije 12 godina, ostaju u trci za nokaut fazu, preciznije za drugo mjesto će igrati u posljednjoj rundi sa Austrijom. Sa druge strane, Jordanci su eliminisani, ali su ponovo pokazali da su zasluženo na Mundijalu, međutim, nisu izdržali poslije vođstva u prvom poluvremenu.
Prvi udarac na utakmici zadao je Jordan u 36. minutu. Centrirao je po zemlji Mohanad Abu Taha, Musa Tamari je promašio loptu, što je iskoristio Nizar Al Rašdan koji je šutirao spoljnim dijelom stopala i matirao Luku Zidana.
Ipak, Jordanci su ostali bez energije u drugom poluvremenu, a presudile su im loše reakcije prilikom kornera.
Rijad Marez je ubacio iz ugla u 69. minutu, a najviši u skoku bio je Nadir Benboali.
Osjetivši da se odbrana rivala ljulja, Alžirci su samo 13 minuta kasnije kompletirali preokret na sličan način. Anis Hađ Musa je centrirao iz kornera, Rami Bensebaini je pokušao, a lopta je pala u peterac gdje se prišunjao Amin Guiri i poslao je u mrežu.